Eiður: Ég vil spila alla leikina

„Ég held að þetta hafi spilast nákvæmlega eins og við bjuggumst við. Það var ekki mikill hraði í leiknum og Færeyingar þokkalega skipulagðir og lítið svæði til að spila fram á við,“ sagði Eiður Smári Guðjohnsen sem lék mjög vel eftir að hafa komið inn á sem varamaður í sigrinum á Færeyingum í kvöld.

„Við hefðum átt að skora fleiri mörk miðað við færin sem við sköpuðum okkur. Það hefðu hæglega átt að vera þrjú, fjögur mörk. Þetta voru dauðafæri.

„Ég held að þetta snúist um það þegar þú spilar gegn liði með gott skipulag að taka eins fáar snertingar á boltann og mögulegt er, sérstaklega á þeirra vallarhelmingi. Það tókst ágætlega á köflum í seinni hálfleik.

„Við hreyfðum boltann hraðar og náðum að halda aðeins meira tempói í leiknum. Það var ágætt að við náðum að skora því Færeyjar, með fullri virðingu, er lið sem við eigum að vinna alla daga. Við erum þokkalega sáttir við sigur en hefðum átt að skora fleiri mörk,“ sagði Eiður en Ísland fékk svo sannarlega færin til að skora fleiri mörk.

„Það var kæruleysisbragur yfir þessu. Eigum við ekki að segja það bara. Það er leiðinlegt að vera að setja eitthvað út á menn,“ sagði Eiður sem fékk það hlutskipti að koma inn af bekknum líkt og í síðustu leikjum sínum með landsliðinu.

„Ég spái ekki mikið í því. Liðið var á góðri siglingu á meðan ég var frá vegna meiðsla. Það er tiltölulega stutt síðan ég kom inn í hópinn aftur og ég verð bara að reyna að sýna hvað ég get ennþá þegar ég fæ tækifæri til en það gefur augað leið að ég vil spila alla leikina.