"Ekki risastór fjárhagslegur pakki”

„Þetta er að okkur sýnist sterkur leikmaður. Hann er fyrst og fremst frábær í vörn en líka flottur línumaður. Hann kemur til með að verða Guðna (Ingvarssyni) innan handar á línunni," segir Arnar Pétursson, annar þjálfara meistaraflokks karla hjá ÍBV.

Eyjamenn hafa gengið frá samningi við Slóvenann Matjaz Mlakar. Um er að ræða margreyndan landsliðsmann Slóvena sem hefur leikið með helstu félagsliðum þjóðar sinnar undanfarin ár við góðan orðstír.

„Hann er reynslumikill og kemur til með að hjálpa okkur mikið," segir Arnar sem á von á línumanninum stóra og stæðilega eftir Þjóðhátíð. „Hann mætir einhvern tímann seinna á Þjóðhátíð," segir Arnar léttur og greinilega kominn í gott stuð fyrir helgina.

Aðspurður hvort ÍBV hafi fundið fjársjóðskistu til að geta fengið leikmann í styrkleikaflokki Mlakar segir Arnar:

„Hann er alls ekkert risabiti fyrir okkur. Við værum ekki að ana út í neina vitleysu hvað það varðar." Arnar segir Eyjamenn hafa haldið vel utan um reksturinn undanfarin ár, verið skynsamir og byggt upp sitt lið hægt og rólega.

„Við viljum alls ekki taka neina áhættu. Þetta er ekki risastór fjárhagslegur pakki fyrir okkur að fá hann til Eyja."

Arnar segir Eyjamenn enn vinna að langtímamarkmiði sem lagt var upp með fyrir þremur árum.

„Við eigum fullt af ungum og efnilegum strákum," segir Arnar og leggur áherslu á að þeir muni áfram vera í aðalhlutverki hjá liðinu. Byggt verði á efnilegu strákunum í Vestmannaeyjum en viðbót á borð við Mlakar sé ekki síst til þess að verða þeim innan handar og aðstoða þá.

Arnar reiknar með því að ÍBV styrki sig frekar áður en undirbúningstímabilinu lýkur.

„Ég get lofað þér því."

ÍBV sækir ÍR heim í 1. umferð deildarinnar þann 21. september.