Hamilton óvænt á ráspól

Lewis Hamilton á Mercedes verður á ráspól í ungverska kappakstrinum í Formúlu 1 á morgun. Úrslitin komu honum sjálfum á óvart.

„Erum við á ráspól?“ spurði Hamilton tæknimenn sína. „Já,“ svöruðu þeir. „Við erum jafn hissa og þú.“

Flestir bjuggust við því að Sebastian Vettel og Red Bull-liðið yrði fljótast í dag eins og á æfingum síðustu daga. Vettel, sem hefur aldrei fagnað sigri í Ungverjalandi, varð þó að sætta sig við annað sætið í tímatökunum í dag.

„Þetta var erfitt í hitanum í dag og mér fannst hringurinn hjá mér ekki það góður. Því kom það mér á óvart að ég væri fremstur. Ég hélt að Sebastian hefði verið fljótastur,“ sagði Hamilton.

Vettel segir þó að það hafi ekkert sérstakt klikkað hjá sér. „Það var ekki margt. Ég var nokkuð ánægður með síðustu tvo hringina því ég var með ný dekk. Kannski var ég ekki nógu ákveðinn um miðbik brautarinnar. Við hefðum átt að taka þetta í dag.“

Liðsfélagi Vettel, Ástralinn Mark Webber, lenti í vandræðum með bílinn sinn í dag og náði ekki tíma í lokatímatökunni. Hann verður því tíundi á ráspól.

Roman Grosjean á Lotus varð þriðji í dag og Nico Rosberg, liðsfélagi Hamilton, fjórði. Fernando Alonso (Ferrari), Kimi Raikkönen (Lotus) og Felipe Massa (Ferrari) komu svo næstir á eftir.