Aníta flaug auðveldlega áfram í úrslitin

Hlauparinn Aníta Hinriksdóttir flaug auðveldlega áfram í úrslit í 800 metra hlaupi á Evrópumóti undir 19 ára en hún kom fyrst í mark á tímanum 2:02,62, langt á undan næstu hlaupurum. Mótið fer fram í Rieti á Ítalíu.

Aníta tekur því þátt í úrslitahlaupinu á laugardaginn en tíminn hennar í dag var töluvert betri en hjá sigurvegara mótsins fyrir tveimur árum í Tallinn.

Aníta er fædd þann 13. janúar árið 1996 og þykir eitt allra mesta efnið í frjálsíþróttaheiminum, hreint magnaður árangur en hlauparinn varð heimsmeistari 17 ára og yngri í sömu grein um síðustu helgi.

Hér að neðan má sjá tímann hjá öllum keppendum í riðlinum hennar Anítu.