Rosberg á ráspól í þriðja skiptið í röð

Nico Rosberg verður fremstur á ráslínu í Mónakókappakstrinum á morgun. Hann var fljótastur umhverfis götubrautina þröngu í tímatökunum sem lauk nú rétt í þessu.

Liðsfélgi Rosbergs, Lewis Hamilton, verður annar en var nálægt því að krækja í ráspól í fyrsta sinn í Mónakó. Aðeins nokkrum sekúndum eftir að Hamilton náði besta tíma ók Rosberg yfir línuna og stal hnossinu. Það verða því tveir Mercedes-bílar fremstir á ráslínu í kappakstrinum.

Faðir Nico, Finninn Keke Rosberg, vann þennan kappakstur í Formúlu 1 fyrir 30 árum. Sá glotti í myndavélarnar þegar ljóst var að sonurinn yrði á ráspól og í kjörstöðu fyrir kappaksturinn.

Framúrakstur er gríðarlega erfiður í Mónakó svo góð rásstaða er mikilvæg. Sebastain Vettel á Red Bull var því kannski ekkert ofboðslega sáttur með þriðja sætið í tímatökunni.

Red Bull og Mercedes voru í stuði í dag vegna þess hve kalt var. Tímatakan fór fram í bleytu en á morgun verður heitara í veðri og spáð er sól og blíðu. Ferrari og Lotus munu að öllum líkindum standa betur að vígi í þeim aðstæðum en keppinautarnir.

Mark Webber var fjórði fljótasti ökuþórinn. Hann ekur Red Bull-bíl eins og Vettel. Á eftir honum ræsa Kimi Raikkönen á Lotus, Fernando Alonso á Ferrari og Sergio Perez á McLaren.

Felipe Massa varð að sitja hjá í tímatökunni vegna skemmdana sem hann vann á Ferrari-bíl sínum þegar hann ók í vegriðið á æfingunni í morgun. Liðið náði ekki að tjasla bílnum saman í tæka tíð. Massa ræsir því aftastur.

Þá gerðist það í fyrsta sinn síðan í Belgíu 2010 að Caterham náði bíl inn í aðra lotu tímatökunnar. Giedo van der Garde sá við Paul di Resta og ræsir fimmtándi á undan Pastor Maldonado.

- Allir tímar eru óopinberir -