Guðjón L. frétti af Gullmerkinu frá Gaupa: Alveg skelfilegt

Guðjón L. Sigurðsson, formaður dómaranefndar HSÍ, vissi ekkert af því að Ingvar Guðjónsson hafi fengið Gullmerki Fram nokkrum klukkutímum áður en hann dæmdi annan leik Fram og Hauka í úrslitaeinvígi N1 deildar karla í handbolta.

„Ég fór að labba í morgun með hundana mína og þá hringir Gaupi (Guðjójn Guðmundsson, íþróttafréttamaður á Stöð 2 Sport) og segir mér þessar fréttir. Ég var í Noregi í gær og kom heim í gærkvöldi. Ég hafði ekki hugmynd um þetta og er búinn að vera í símanum síðan til að reyna svara spurningunni: Af hverju vissi ég þetta ekki," sagði Guðjón L. Sigurðsson, formaður dómaranefndar HSÍ, þegar Vísir leitaði viðbragða við því af hverju dómari dæmdi hjá Fram aðeins nokkrum klukkutímum eftir að hann fékk gullmerki félagsins.

„Ég vil ekki kalla það tabú en það er eins og engum hafi dottið það í huga að láta hvorki mig eða menn í dómaranefndinni vita að þessi staða væri uppi. Ég er virkilega vonsvikinn gagnvart öllum sem vissu af þessu að hafa ekki sagt okkur frá þessu fyrir leik. Þá hefðum við væntanlega brugðist við á þann hátt að skipta um par. Ég er jafn svekktur og hreyfingin öll hlýtur að vera því þetta er alveg skelfilegt," sagði Guðjón.

„Ég bara næ því ekki að þeim hafi ekki dottið í hug að láta mig vita, fyrir það fyrsta að þetta stæði til og í öðru lagi að hann hafi tekið á móti merkinu þennan morgun. Það er bara forkastanlegt," sagði Guðjón en bætti svo við:

„Ég vil að það komi alveg skýrt fram að það er enginn að saka hann um það að hann hafi ætlað að vera óheiðarlegur eða að hann hafi verið það. Aftur á móti er þetta einfaldlega staða sem á ekki að koma upp. Þarna er verið að búa til aðstæður sem menn þurfa ekki að vera í. Menn hringja í mig af minna tilefni þegar er einhver vafamál um hvort þeir geti dæmt leiki," sagði Guðjón.

„Í þessi tilefni finnst mér að dómararnir, hreyfingin eða Fram hefði átt að láta okkur vita að þetta hafi komið upp. Ég er í eftirliti á kvennaleiknum sem fór fram í Framhúsinu á undan þessum leik og það er enginn að segja mér frá þessu þá," segir Guðjón.

„Þetta er búið og gert og það verður bara að læra af þessu. Þetta er mál sem hefði aldrei átt að koma upp. Ég og þeir sem ég hef náð í dómaranefnd erum mjög óhressir með þetta," sagði Guðjón.

Sportið á Vísi er komið á Facebook. Fylgstu með.