Hítará uppseld!

Veiðileyfasala hefur gengið vel í Hítará á Mýrum fyrir komandi sumar. Nú er svo komið að allar stangir sumarsins eru seldar, segir í frétt á vef SVFR.

"Líklegt þykir að afnám fæðisskyldu í veiðihúsinu Lundi hafi haft nokkuð að segja um eftirspurnina, en mikil ánægja er með þá breytingu að veiðimenn eldi sjálfir utan besta veiðitímans," segir í fréttinni.

Aðrar skýringar sem nefndar eru í fréttinni er að veiðisvæði árinnar stækkaði til muna þegar að veiðisvæðið fyrir ofan Kattarfoss bættist við aðalsvæði árinnar, en nú nær það alla leið upp að Hítarvatni.

SVFR minnir á að þó uppselt sé í Hítará þá má enn nálgast veiðileyfi í hliðaránum Tálma og Grjótá, en þar fer veiðidögum þó fækkandi. 

 svavar@frettabladid.is