Tiger aftur í efsta sæti heimslistans

Tiger Woods fagnaði sigri á Bay Hill PGA-mótinu í golfi í dag og endurheimti þar með toppsæti heimslistans í golfi eftir þriggja ára bið.

Frægt er þegar að Tiger féll af stalli sínum með látum eftir að upp komst um ítrekað framhjáhald hans og ótryggð við þáverandi eiginkonu sína, Elin Nordegren.

Það tók Tiger langan tíma að komast aftur á beinu brautina en meiðsli settu einnig strik í reikninginn. Tiger og skíðakonan Lindsay Vonn tilkynntu fyrir viku síðan að þau væru kærustupar og nú er hann aftur orðinn besti kylfingur heims.

Honum líður greinilega vel á boðsmóti Arnold Palmer sem lauk á Bay Hill-vellinum í dag. Þetta var hans áttundi sigur á mótinu frá upphafi og 48. sigur hans á PGA-mótaröðinni.

„Þetta er afleiðing mikillar vinnu og þolinmæði," sagði Woods eftir sigurinn í dag. Lokahringnum var frestað í gær vegna veðurs en Tiger hélt ró sinni í dag og hélt minnst tveggja högga forystu allt til loka. Hann spilaði á 70 höggum í dag og sigraði með tveggja högga forystu á Englendinginn Justin Rose.

Tiger féll niður í 58. sæti heimslistans á sínum tíma en hefur síðan á Bay Hill-mótinu í fyrra unnið alls sex PGA-mót. Næsta mót er Masters-mótið og þar á Tiger möguleika á að binda enda á fimm ára bið eftir sigri á stórmóti.