„Flokkur manna og kvenna hefur að undanförnu verið að stöfum í Ásgarðshúsinu á bökkum Sogsins," segir á vef Lax-á. „Kominn var tími á andlitslyftingu á húsinu og var vel í lagt í þetta skiptið. Húsið að var allt málað að innan í hólf og gólf, öll húsgögn endurnýjuð og herbergin parketlögð.
Einnig var eldhúsinnrétting tekin í gegn og innréttingar á öllum baðherbergjum endurnýjaðar og ný blöndunartæki sett á hvert þeirra. Eins áttu sér stað allsherjar þrif og hefur húsið örugglega sjaldan verið eins hreint og snyrtilegt og það er nú."
Samkvæmt upplýsingum á vef Lax-á á verður húsið málað með vorinu og borið á palla.
Vorveiðin í Ásgarði hefst á mánudaginn, 1. apríl. Enn er töluvert laust og geta menn fundið lausa daga á vefnum agn.is. Þess má geta að fram til 20. júní fylgir veiðihúsið í Ásgarði með silungasvæðinu og kostar stöngin 8.500 krónur.
trausti@frettabladid.is
