Anna Úrsúla ber barn undir belti

Landsliðskonan Anna Úrsúla Guðmundsdóttir leikur ekki með Val á þessu tímabili, þar sem hún á von á barni.

Þetta kemur fram á Sport.is í dag. Anna Úrsúla missti af síðasta leik Vals eftir að hafa meiðst á auga á æfingu.

Anna Úrsúla, sem fékk fingur í augað, gæti samkvæmt Sport.is misst hluta af sjón á viðkomandi auga. Við skoðun kom í ljós að hornhimna hafi rifnað og að blætt hafi inn á augnbotninn.

Í síðustu viku var greint frá því að Valur hefði gengið frá samningum við línumanninn Sonata Viunajte frá Litháen. Hún kemur til með að fylla skarð Önnu Úrsúlu í liði Vals.