Massa á Ferrari langfljótastur í Jerez

Felipe Massa setti besti tíma ársins á Jerez-brautinni í dag þegar hann ók hringinn 0,4 sekúndum hraðar en Romain Grosjean gerði í gær og heilli sekúndu hraðar en Jenson Button gerði fyrir tveimur dögum. Mun fleiri hringir voru eknir í dag en í gær.

Það var helst að frétta af æfingunum í dag að Nico Rosberg gat ekið Mercedes-bílnum án vandræða í allan dag. Hann bætti um betur og ók heila 148 hringi, mun fleiri en nokkur hefur gert í ár. Michael Schumacher ók mest 139 hringi á einum degi í fyrra fyrir Mercedes.

Hringjafjöldinn var mikilvægur til að bæta upp fyrir takmarkaðar prófanir á þriðjudag og miðvikudag en bilanir gerðu það að verkum að þeir Lewis Hamilton og Rosberg hafa þurft að sitja hjá mest allt æfingatímabilið.

Rosberg átti hins vegar næst besta tíma á eftir Massa. Sebastian Vettel átti þriðja besta tíma í Red Bull-bílnum nýja sem hann segir klárlega vera skref í rétta átt síðan í fyrra. „Ég held að bíllinn virki mjög vel. Auðvitað er erfitt að dæma hraðann en hvað áreiðanleika varðar er hann góður," sagði Vettel.

Nokkur gagnrýnir hefur verið á æfingastaðinn í Jerez á Spáni. Pirelli-dekkjaframleiðandinn segir brautina ekki gefa nógu góða mynd af því hvernig nýju dekkin virka og vilja að brautin verði ekki notuð á næsta ári nema nýtt slitlag verði lagt í tæka tíð.

„Það er eriftt að meta hversu vel við stöndum því allir voru að leika sér með mismunandi eldsneytismagn," sagði Vettel enn fremur. „Þetta eru jafnframt fyrstu æfingarnar og við erum í Jerez þar sem dekkjaslitið er mjög mikið og dekkin spila stærra hlutverk en undir venjulegum kringumstæðum. Það eru of margar breytur sem hafa áhrif."

Yfirmaður Vettels hjá Red Bull, Christian Horner liðstjóri, er hins vegar viss um að ekkert lið muni hafa yfirburði á komandi keppnisvertíð. „Ég held að þetta verði þannig að mismunandi brautir henti mismunandi bílum," sagði hann í morgun. „Ég held að þetta verði eins og í fyrra. Fjögur eða fimm lið munu hafa burði til að vinna mót og það verður í höndum liðanna og ökumannanna að ná sem jöfnustum og bestum árangri í öllum mótunum 19."

Jerez	7. febrúar 2013	Æfing 3
P	Ökuþór	Lið	Tími	Bil	Hringir
1	Massa	Ferrari	1:17,879		85
2	Rosberg	Mercedes	1:18,766	0,548	148
3	Vettel	Red Bull	1:19,052	0,834	102
4	Raikkonen	Lotus	1:19,200	0,982	40
5	Vergne	Toro Rosso	1:19,247	1,029	85
6	Rossiter	Force India	1:19,303	1,085	42
7	Button	McLaren	1:19,603	1,385	83
8	Gutierrez	Sauber	1:19,934	1,716	110
9	Chilton	Marussia	1:21,269	3,051	78
10	Bottas	Williams	1:21,575	3,357	86
11	Pic	Caterham	1:22,352	4,134	57
12	di Resta	Force India	1:23,729	5,511	7
		Samtals			923