Valskonur unnu 21 marks sigur - myndir

Valur náði fjögurra stiga forskoti á toppi N1 deildar kvenna í handbolta í kvöld eftir 21 marks sigur á Aftureldingu, 37-16, í Vodafonehöllinni á Hlíðarenda í kvöld.

Valskonur hafa nú unnið tvo örugga sigra eftir tapið óvænta á móti Stjörnunni á dögunum en þetta var fyrsti leikurinn í fimmtándu umferðinni. Valsliðið gerði betur en í fyrri leiknum á móti Mosfellsingum sem endaði með 14 marka sigri, 35-21.

Umferðin klárast síðan á morgun með fjórum leikjum: Stjarnan - Haukar (13.30, Mýrin), ÍBV - Selfoss (13.30 Vestmannaeyjar), HK - FH (14.00, Digranes) og Grótta - Fram (15.30, Hertz höllin á Seltjarnarnesi).

Daníel Rúnarsson, ljósmyndari Fréttablaðsins og Vísis, var á leiknum í kvöld og náði þessum skemmtilegu myndum hér fyrir ofan.