Þrettán netfyrirtæki kvartað

 Framkvæmdastjórn Evrópusambandsins mun taka ákvörðun um það nú eftir páska hvort netrisinn Google verði kærður fyrir samkeppnisbrot. Þrettán netfyrirtæki hafa kvartað yfir því að Google beiti ráðandi stöðu sinni gegn samkeppnisaðilum samkvæmt frétt BBC.

Google hefur hafnað því að beita markaðshindrunum eða öðrum bolabrögðum gegn samkeppnisaðilum sínum. Nýjasta dæmið um kvartanir vegna Google kemur frá vefsíðunni Trip Advisor, sem sérhæfir sig í ferðamálum. Í yfirlýsingu frá síðunni er þess óskað að Evrópusambandið grípi til aðgerða til að tryggja virka samkeppni á netinu.

Google hefur verið að færa sig upp á skaftið með því að bjóða upp á þjónustu tengda ferðalögum. Fyrirtæki í samkeppni við Google á því sviði hafa kvartað yfir því að vefsíður Google komi frekar upp við netleit með leitarvél Google en samkeppnisaðilarnir. Rannsókn ESB hefur verið í gangi frá febrúar 2010 en er nú á lokametrunum samkvæmt frétt BBC. Sambærileg rannsókn á starfsháttum fyrirtækisins er í gangi í Bandaríkjunum. - bj