Enn má tilnefna til Samfélagsverðlauna

Frestur lesenda til að tilnefna til Samfélagsverðlauna Fréttablaðsins rennur út í næstu viku, miðvikudaginn 1. febrúar.

Markmiðið með Samfélagsverðlaununum er að beina sjónum að góðum verkum sem unnin eru í samfélaginu af ósérhlífnu fólki og oft og tíðum án þess að mikið fari fyrir þeim.

Tilnefna má til verðlaunanna í fjórum flokkum en einnig eru veitt heiðursverðlaun fyrir ævistarf einstaklings.

Í fyrra bárust nærri fjögurhundruð tilnefningar til Samfélagsverðlaunanna en að loknum tilnefningarfresti tekur dómnefnd við og útnefnir þrjá í hverjum flokki, þar af einn sem sjálf verðlaunin hlýtur.

Sjálf Samfélagsverðlaunin nema einni milljón króna en í fyrra komu þau í hlut Reykjadals í Mosfellsbæ. Í sumarbúðunum þar dveljast árlega á milli tvö og þrjú hundruð fötluð börn af öllu landinu en um skeið var tvísýnt um hvort leggja þyrfti starfsemi sumarbúðanna niður vegna fjárskorts. Til Samfélagsverðlaunanna má tilnefna félagasamtök sem hafa unnið framúrskarandi mannúðar- eða náttúruverndarstarf. Í þeim flokki nema verðlaunin einni milljón króna.

Hvunndagshetjan í fyrra var Ásmundur Þór Kristmundsson björgunarsveitarmaður sem vann björgunarafrek í Þórsmörk í ágúst 2010. Til hvunndagshetju má tilnefna einstaklinga sem hafa sýnt einstaka óeigingirni eða hugrekki, við einn atburð eða með vinnu að ákveðnum málaflokki í lengri tíma.

Í flokknum Frá kynslóð til kynslóðar hlaut Jón Stefánsson kórstjóri verðlaunin í fyrra. Þar koma til greina kennarar, leiðbeinendur, þjálfarar eða aðrir uppfræðarar sem skarað hafa fram úr á einhvern hátt, einnig félagasamtök sem sinna börnum af sérstökum metnaði og alúð.

Í flokknum Til atlögu gegn fordómum má tilnefna einstaklinga eða félagasamtök sem hafa unnið ötullega að því að eyða fordómum. Verðlaun í þessum flokki komu í fyrra í hlut Listasmiðjunnar Litrófs en í henni er unnið að vináttu milli barna af erlendum uppruna og íslenskra barna.

Heiðursverðlaun Samfélagsverðlauna Fréttablaðsins komu í fyrra í hlut Jennu Jensdóttur, kennara og rithöfundar, en þau eru veitt einstaklingi sem hefur helgað líf sitt baráttu fyrir betra samfélagi.

Tilnefna má til Samfélagsverðlauna á visir.is/samfelagsverðlaun.

steinunn@frettabladid.is