Mikil ásókn í Elliðaárnar

Töluverð ásókn er í Elliðárnar og Straumana fyrir næsta sumar, að því er fram kemur á vef Stangveiðifélags Reykjavíku (SVFR).

Á vefnum er búið að taka saman hvert hugur félagsmanna leitar fyrir næsta sumar enda einungis tíu dagar í að umsóknarfrestur renni út. Umsóknarfresturinn átti að renna út 13. desember en stjórn félagsins ákvað að framlengja hann til 28. des.

"Að venju sækja margir um Elliðaárnar, ekki síst þar sem búið er að breyta umsóknarferlinu, og þarf ekki lengur að setja A-umsóknir sínar á dagana. Hafa skal þó í huga að þar sem árnar eru seldar í hálfum dögum þá er framboð nokkuð gott, eða hátt í þúsund leyfi. Þó má búast við að þröngt verði á þingi í júlímánuði líkt og undanfarin ár," segir á vef SVFR.

Þá segir að Straumarnir séu mjög eftirsóttir, sér í lagi snemmsumars, og ljóst að búast má við drætti um einhverja daga í júnímánuði. Hítará á Mýrum er sömuleiðis eftirsótt.

"Norðurá í Borgarfirði á sína föstu aðdáendur, og er mikið sótt í hollin fyrir 18. júní að þessu sinni - og svo aftur um og eftir miðjan ágústmánuð.

Í Langá á Mýrum er greinilega ásókn í stöku dagana í september. Þess má geta að júnímánuður var í forúthlutun að þessu sinni og seldust þau leyfi upp enda á viðráðanlegu verði og veiðivon mikil," segir á vef SVFR.

Dagarnir í Bíldsfelli í Sogi eru nokkuð eftirsóttir, að því er segir á vefnum, og þunginn mestur í ágúst.

"Eins og búist var við þá er minni umsóknarþungi í Laxá í Dölum, á Nesveiðar og í Leirvogsá á milli ára, enda urðu þessi veiðisvæði hlutfallslega verst úti í aflabrestinum í sumar," segir á vef SVFR.