Inter steinlá í Rússlandi

Þremur fyrstu leikjum kvöldsins í Evrópudeild UEFA er nú lokið en í þeim mátti finna tvo rússneska sigra á ítölskum liðum.

Inter tapaði stórt fyrir Rubin Kazan á útivelli, 3-0. Með sigrinum tryggði Rubin sér efsta sæti H-riðils en bæði lið voru komin áfram í 32-liða úrslitin fyrir leikinn.

Þá gerðu Neftchi Baku og Partizan Belgrad 1-1 jafntefli í sama riðli. Bæði lið eru með tvö stig.

Að síðustu vann Anzhi góðan 2-0 sigur á Udinese með mörkum þeirra Chris Samba og Samuel Eto'o. Anzhi er þar með nánast öruggt með sæti sitt í 32-liða úrslitunum.

Liverpool og Young Boys eru í sama riðli og mætast síðar í kvöld. Þau eru bæði með sex stig í 2.-3. sæti deildarinnar.