Um 300 flugliðar í hópmálsókn gegn SAS flugfélaginu

Um 300 flugliðar hjá SAS flugfélaginu hafa fengið leyfi borgardóms Kaupmannahafnar til þess að fara í hópmálsókn gegn félaginu.

Viðkomandi flugliðar eru allir komnir á eftirlaun og snýst málsóknin um vanefndir SAS á að uppfylla eftirlaunasamninga sem gerðir voru við þessa flugliða.

Fyrir þremur árum ákvað SAS einhliða að skera niður framlag félagsins í eftirlaunasjóð flugliðanna. Þessi ákvörðun er talin hafa kostað hvern þeirra að meðaltali um 25.000 danskar krónur eða yfir hálfa milljón króna. Vilja þeir endurheimta þetta fé með málsókninni.