"Aðeins Íslendingar nógu brjálaðir fyrir svona verkefni“

Hugmyndir íslenska tölvuleikjaframleiðandans CCP um nýjasta leik sinn, DUST 14, eru sannarlega stórhuga. CCP hefur nú þegar sett saman fimm ára áætlun um tölvuleikinn en fyrirtækið vonast til að reka leikinn í 20 ár.

John Lander, framleiðandi EVE Online og DUST 514, upplýsti um fyrirætlanir CCP í samtali við fréttasíðuna GamesIndustry.biz í dag.

DUST 514 er fyrstu persónu skotleikur sem gerist í sama söguheimi og EVE Online. Spilarar leikjanna munu því geta haft samskipti og aðstoðað hvorn annan. Leikurinn verður aðeins fáanlegur á PlayStation 3 leikjatölvunni og það spilurum að kostnaðarlausu.

PlayStation 3 er sannarlega komin til ára sinn og því hafa margir furðað sig á því að Sony og CCP hafi ákveðið að ráðast í svo metnaðarfullt verkefni þegar ný leikjatölva er á næsta leiti.

Lander sagði að DUST 514 væri ekki aðeins hugsaður sem tölvuleikur fyrir PlayStation 3. Notendur munu geta spilað leikinn á leikjatölvum Sony næstu fimm árin hið minnsta. Þá hafi CCP viðrað hugmyndir um að þjónusta spilara DUST 514 næstu tuttugu árin.

„Við höfum unnið að útgáfu DUST 514 í samstarfi við Sony," sagði Lander. „Markmið okkar er að gefa leikinn út á PlayStation 3. En við ætlum okkur að viðhalda leiknum í mörg, mörg ár."

Þá sagði Lander að DUST 514 væri væntanlegur seinna á þessu ári.

DUST 514 þykir afar metnaðarfullt verkefni, þá sérstaklega fyrir þær sakir að spilarar á PC-tölvum og leikjatölvum geta nú í fyrsta skipti haft samskipti sín á milli.

„Ég veit ekki til þess að nokkur annar hópur af fólki en Íslendingar væri nógu brjálaður til að leggjast í svo metnaðarfullt verkefni," sagði Lander. „En ef þú hefur einhvern tíma búið á Íslandi yfir vetrartímann, þá veistu að Íslendingar geta í raun gert hvað sem er... bókstaflega hvað sem er."