Rakel Dögg spilaði sinn fyrsta leik eftir krossbandsslit

Rakel Dögg Bragadóttir, fyrirliði íslenska kvennalandsliðsins, spilaði í dag sinn fyrsta leik síðan að hún sleit krossband skömmu fyrir HM í Brasilíu fyrir tæpu ári síðan.

Rakel Dögg skoraði 3 mörk í tapleik á móti Íslands- og bikarmeisturum Vals í N1 deild kvenna í Mýrinni. Rakel var ekki búin að vera með í þremur fyrstu leikjum Stjörnunnar á tímabilinu þar sem að sjúkraþjálfarinn vildi að hún æfði á fullu í fimm til sex vikur fyrir fyrsta leik.

„Þetta gekk bara fínt og mér leið bara mjög vel. Ég var óvenju spræk því ég hélt ég yrði meira hikandi. Þegar maður var kominn inn í leikinn þá var ég ekkert að hugsa út í það að ég væri að stíga upp úr meiðslum," sagði Rakel Dögg í samtali við Vísi.

„Ég er pínu þreytt og svo fékk í slink á hnéð í lokin og fór bara útaf síðustu tíu mínúturnar. Það er ekkert alvarlegt en maður er orðinn aðeins skynsamari með árunum," sagði Rakel Dögg óvenju kát eftir tapleik enda mikill sigur fyrir hana að komast aftur inn á handboltavöllinn.