Fabregas: Hefði vel getað klárað ferilinn hjá Arsenal

Cesc Fabregas segir að það hefði ekkert verið því til fyrirstöðu hjá sér að spila með Arsenal út ferilinn ef Barcelona hefði ekki haft áhuga á honum.

„Það var draumur minn að fá að spila með Barcelona en ég átti ekki bitur ár með Arsenal," sagði hann við franska dagblaðið L'Equipe.

„Það er fjarri sannleikanum. Ég bjó í fallegustu borg heims, spilaði með ótrúlegu liði með frábæran þjálfara og stuðningsmenn sem ég dáði."

Hann greindi einnig frá því að hann hefði tekið á sig launalækkun þegar hann kom til Barcelona.

„Það eru til lið sem borga betur. En þetta var skýrt í mínum huga - annað hvort að koma til Barcelona eða vera áfram hjá Arsenal. Ég var ekki að hugsa um peningana."