Mourinho ætlar aftur til Englands

Portúgalski þjálfarinn Jose Mourinho segist ætla aftur í enska boltann þegar tíma hans með Real Madrid er lokið. Hann segist þó vera mjög hamingjusamur á Spáni.

"Ég get alveg sagt það heiðarlega að eftir þetta skref á mínum ferli þá mun ég halda aftur til Englands. Hvenær það verður hef ég ekki hugmynd um enda er ég hamingjusamur í starfi hjá besta félagi heims," sagði Mourinho.

Mourinho hefur lengi verið orðaður við Man. Utd og hermt að hann verði arftaki Sir Alex Ferguson er þar að kemur.

"Ég myndi frekar kjósa að Ferguson væri enn að þjálfa þegar ég kem aftur til Englands. Fótboltinn mun nefnilega tapa miklu er hann hættir. Hann er stjórinn og ég kalla hann það af því hann er stjóri stjóranna."