Metlax úr Selá í dag: Vopnafjarðarárnar fullar af laxi

 Mikið hefur sést af laxi í ám í Vopnafirði seinustu daga. Um helgina veiddust rúmlega 150 laxar á stöng í Hofsá og Selá þar af allnokkrir stórlaxar. Í morgun veiddi hinn landsþekkti veiðmaður Árni Baldursson 109 sentímetra hæng í Skipahyl sem er um 15 kílómetra frá sjó. Árni segir laxinn vera þann stærsta sem hann hefur séð hér á landi og sennilega er þetta stærsti lax sem veiðst hefur í Selá í sögu þessarar rómuðu veiðiperlu. Árni segir laxinn hafa verið mjög þykkan og þungan. Laxinn var veiddur með 9,5 feta - línu 9, - Loop stöng á «Hitch» túbu með krók nr. 14 og 12 punda taum. Þrír aðrir smærri laxar komu á land neðar í þessum hyl í morgun.

Göngur byrjuðu vel í þessum rómuðu laxveiðiám Vopnafjarðar og laxinn dreifði sér vel um árnar. Þá hafa sést miklar göngur í Sunnudalsá og Vesturdalsá. Laxateljari er neðarlega í Vesturdalsá og í morgun höfðu um 400 laxar farið í gegnum teljarann þar af margir stórlaxar en myndir eru teknar af öllum löxunum. Margir laxar hafa og farið í gegnum teljarann í Selárfossi og um tíu einnig upp á fjalli ofan við Efrifoss.

Veiðiklúbburinn Strengur er bæði með Hofsá og Selá á leigu. Miklar endurbætur hafa verið gerðar við veiðihúsin og við Selá hefur verið reist nýtt og glæsilegt hús sem ber nafnið Fossgerði.

Nú er stórstreymt og veðrabreytingar og hugsa veiðimenn sér því gott til glóðarinnar þar sem laxagöngur í Vopnafirðinum eru jafnan mestar á bilinu 20. júlí fram í miðjan ágúst.

svavar@frettabladid.is