Messi meiddur og missir af fyrsta leik Vilanova

Tímabilið byrjar ekki alltof vel fyrir besta knattspyrnumann í heimi. Lionel Messi meiddist á kálfa á æfingu með Barcelona í gær og verður því ekki með liðinu í fyrsta leiknum undir stjórn Tito Vilanova. Vilanova tók eins og kunnugt er við liðinu af Pep Guardiola.

Barcelona byrjar undirbúningstímabilið formlega í dag þegar liðið mætir þýska liðinu Hamburger SV í 125. ára afmælisleik þýska félagsins. Leikurinn fer fram í Þýskalandi og auk Messi verða spænsku Evrópumeistararnir ekki með spænska liðinu.

Messi fór í myndatöku í morgun og þar kom í ljós mar á kálfavöðva. Það er ekki ljóst hvort að argentínski snillingurinn missir af fleiri leikjum en Barcaelona spilar alls sjö æfingaleiki fyrir fyrsta opinbera leik tímabilsins sem verður á móti Real Madrid í spænska ofurbikarnum 23. ágúst næstkomandi.