Dræmt á efstu svæðum Blöndu

Veiðin á þremur efstu svæðum Blöndu hefur farið afar hægt af stað fyrstu þrjár vikur veiðitímabilsins.

Þannig hafa aðeins verið bókaðir tíu laxar á stangirnar þrjár á svæði III, sautján laxar á sex stangir á svæði II og 22 laxar á þrjár stangir á svæði IV.

Veiðin er því nokkuð lítil á hverja stöng á þessum svæðum eða lauslega reiknað 0,2 laxar á hvern stangardag sem hefur verið í boði. Þess ber þó að geta að viðveran á svæði II hefur ekki verið mikil.

Hins vegar hafa um 300 laxar komið á land á svæði I að sögn Birgittu H. Halldórsdóttur, veiðivarðar á Syðri-Löngumýri. Blanda er þannig alls komin í um 350 veidda laxa. Birgitta segir menn þó hafa séð talsverðar nýjar göngur í ána á síðustu dögum.

Birgitta, sem einnig annast veiðivörslu í Svartá, segir að menn sem voru þar við veiðar í gærmorgun hafi verið kampakátir eftir að hafa veitt sjö laxa úr göngu sem þá fór upp ána. Í Svartá var heildartalan komin í 30 laxa