Rakel skoraði þrennu gegn Fylki | Jafntefli í Kaplakrika

Rakel Hönnudóttir skoraði þrennu í 4-0 stórsigri Breiðabliks á Fylki í tíundu umferð Pepsi-deildar kvenna í kvöld. Þá skildu FH og Afturelding jöfn 2-2 í fallslag í Kaplakrika.

Rakel skoraði tvívegis í fyrri hálfleiknum og sá til þess að Kópavogsstúlkur færu með tveggja marka forystu í leikhléi. Gestirnir ætluðu greinilega ekki að láta leikinn gegn FH í síðustu umferð endurtaka sig þar sem liðið tapði 3-2 eftir að hafa leitt 2-0.

Rakel bætti við þriðja marki sínu áður en framherjinn Björk Gunnarsdóttir innsiglaði 4-0 sigur Blika. Fylkiskonur hafa nú tapað tveimur deildarleikjum í röð 4-0 auk þess sem liðið féll úr bikarnum í millitíðinni gegn Þór/KA.

Rakel hefur nú skorað átta mörk í deildinni og er næstmarkahæst ásamt Dönku Podovac hjá ÍBV. Sandra María Jessen er markahæst með tíu mörk.

Jafn í Kaplakrika

FH og Afturelding skildu jöfn 2-2 í fallslag í Kaplakrika. Carla Lee kom gestunum yfir 1-0 á 15. mínútu en Sara McFadden jafnaði skömmu fyrir leikhlé.

Lee var aftur á ferðinni á 74. mínútu en aftur var það McFadden sem jafnaði fyrir FH og tryggði liðinu eitt stig. FH-ingar hafa fengið fjögur stig úr tveimur síðustu leikjum sínum en Mosfellingar sjö úr síðustu þremur.

Upplýsingar um markaskorara frá Úrslit.net.