Elliðaárnar: 3,5 laxar á stöng á dag

Alls höfðu 504 laxar veiðst í Elliðaánum í gærkvöldi og endurspegla þær aflatölur frábæra veiði í ánum allt frá opnun ánna þann 20. júní. Óhætt að segja að á opnunardaginn hafi tónninn verið gefinn fyrir áframhaldið, en 31 lax veiddist í opnunni eins og sagt er frá á vef SVFR.

Teljarinn við Rafstöðina sýnir að um 800 laxar hafa gengið um hann frá opnun hans sem var laust eftir miðjan júnímánuð. Meira af laxi hefur gengið í Elliðaárnar miðað við sama tíma í fyrra og veiðin er líka umtalsvert betri. Munar þar ríflega 100 löxum.

Meðalveiðin í ánum það sem af er veiðitímabilinu er tæplega 3,5 laxar á stöng á dag og er leitun að betri aflabrögðum í laxveiðiám á landinu.

Vatnsbúskapur Elliðaánna er með ágætum, þrátt fyrir langvarandi þurrka undanfarnar vikur. Meðalrennsli ánna um þessar mundir er um 1,8 rúmmetrar sem er gott sumarrennsli.

Lax er að ganga í árnar á hverju flóði og nú styttist í stórstreymið og má búast við kröftugum göngum næstu daga ef að líkum lætur. Mun það væntanlega skila sér í áframhaldsandi góðri veiði.

svavar@frettabladid.is