Hamilton á ráspól á Spáni

Lewis Hamilton krækti í sinn þriðja ráspól í tímatökum fyrir spænska kappaksturinn sem fram fóru í dag. Hann fór hálfri sekúntu hraðar en Williams-ökuþórinn Pastor Maldonado sem fór nokkuð óvænt annan hraðasta hring í tímatökunum.

Heimamaðurinn Fernando Alonso ræsir þriðji í Ferrari-bílnum. Lotus-mennirnir Romain Grosjean og Kimi Raikkönen þar á eftir. Þá ræsir Sergio Perez í sjötta sæti í Sauber-bílnum.

Tímatakan var lituð af dekkjavali sem mun hafa mikil áhrif í keppninni á morgun. Sebastian Vettel og Michael Schumacher settu ekki í tíma í síðustu umferðinni til þess að spara dekkin. Þeir ræsa í áttunda og níunda sæti á undan Kamui Kobayashi.

Sauber-bíll þess síðastnefnda bilaði eftir aðra umferðina og hann gat því ekki ekið í síðustu lotunni.

Jenson Button og Mark Webber voru í vandræðum, komust ekki upp úr annari lotu og ræsa í ellefta og tólfta sæti. Það verða að teljast vonbrigði fyrir McLaren og Red Bull sem leiða stigamótið og meiga ekki misstíga sig í titilbaráttunni.

Felipe Massa var aðeins sautjándi og sat steinrunninn í Ferrari-bílnum þegar úrslitin voru ljós.

HRT-bílarnir voru báðir utan 107% reglunnar. Narain Karthikeyan var langt frá en Pedro de la Rosa nokkrum sekúntubrotum frá. Dómarar mótsins munu ákveða hvort annar eða báðir ökumenn fái að keppa þrátt fyrir að vera ekki nógu fljótir.