Eldsvoði í bílskúr Williams-liðsins til rannsóknar

Eldur braust út í bílskúr Williams-liðsins á brautinni í Barcelona í gær, aðeins rúmum klukkutíma eftir að Pastor Maldonado sigraði kappaksturinn fyrir liðið.

Talið er að eldurinn hafi kviknað út frá eldsneytishylki aftast í bílskúrnum þegar liðið var að pakka saman og ganga frá eftir kappaksturinn. Eldurinn var fljótur að breiðast út en með snarræði náðu liðsmenn Williams, Caterham og Foce India að ráða niðurlögum loganna á skömmum tíma.

Sjö starfsmenn liðanna voru sendir á sjúkrahús í kjölfarið en alls sóttu 30 starfsmenn sjúkraskýlið við brautina. Þeir sem sendir voru á sjúkrahús hljóta nú meðferð við "ýmsum meiðslum", eins og segir í yfirlýsingum Williams-liðsins og FIA.

Tækjabúnaður Williams er að öllum líkindum skemmdur. Bíll Bruno Senna var í skúrnum þegar eldurinn braust út. Bíll Maldonado var í "parc-ferme" þar sem hann er skoðaður af mótsstjórn og er því heill.

Yfirvöld á Spáni vinna nú með Williams-liðinu og reyna að komast að orsök eldsvoðans. Þetta er í annað sinn sem eldur brýst út og er laus í húsakynnum Formúlu 1-liða í ár. Í Malasíu brann hjólhýsi Lotus-liðsins til grunna vegna skammhlaups í ísskáp.