Juventus meistari á Ítalíu | Inter vann borgarslaginn

Juventus tryggði sér í kvöld meistaratitilinn á Ítalíu með 2-0 sigri á Cagliari. Á sama tíma hafði Inter betur gegn AC Milan í grannaslag liðanna.

Þökk sé tapi AC Milan dugði Juventus sigur í sínum leik til að tryggja sér titilinn. Fögnuður leikmanna var því mikill í leikslok.

Juventus hefur enn ekki tapað leik á tímabilinu en liði mætir Atalanta í lokaumferð tímabilsins um næstu helgi. Liðið hefur unnið 22 leiki til þessa og gert fimmtán jafntefli.

Þetta er í fyrsta sinn sem Juventus verður meistari síðan að titilinn var tekinn af liðinu vegna veðmálahneykslisins sem skók ítalska knattspyrnu árið 2006.

AC Milan er í öðru sæti deildarinnar en tvö efstu liðin voru fyrir löngu búin að stinga önnur af. Zlatan Ibrahimovic skoraði bæði mörk liðsins í 4-2 tapi fyrir Inter.

Diego Milito skoraði þrennu fyrir Inter og Maicon það fjórða.

Udinese er í þriðja sæti með 61 stig eftir 2-0 sigur á Genoa og stendur því vel að vígi í baráttunni um sæti í Meistaradeildinni á næstu leiktíð. Lazio kemur næst með 59 stig og Napoli og Inter eru með 58 stig.

Úrslit dagsins:

Siena - Parma 0-2

Atalanta - Lazio 0-2

Udinese - Genoa 2-0

Bologna - Napoli 2-0

Palermo - Chievo 4-4

Novara - Cesena 3-0

Inter - AC Milan 4-2

Cagliari - Juventus 0-2