Evróputímabilið hefst á Spáni um helgina

Á sunnudag fer spænski kappaksturinn fram í Barcelona og markar upphaf tímabilsins í Evrópu. Í gegnum tíðin hefur fyrsti Evrópukappaksturinn verið vettvangur liðanna til að kynna nýjar uppfærslur á bílum sínum og virðist ekki vera nein breyting á því í ár.

Formúla 1 hefur þá verið í þriggja vikna fríi síðan síðast var keppt í Barein. Í síðustu viku voru æfingar í Maranello á Ítalíu þar sem liðin reynsluóku nýjum breytingum á bílunum.

Spænski kappaksturinn hefur verið haldinn í Barcelona síðan árið 1991. Brautinni hefur verið breytt þónokkuð síðan þá en allra síðustu breytingarnar eru á síðasta kafla brautarinnar. Fyrir síðustu beygju hefur verið komið fyrir þröngum hlekk sem gerir brautina enn flóknari fyrir ökumenn.

Í fyrra fór Sebastian Vettel með sigur af hólmi í kappakstrinum á Spáni. Hann kom í mark rétt á undan Lewis Hamilton. Brautin er þekkt fyrir að bjóða upp á nokkuð jafnan kappakstur, sem eru frábærar fréttir fyrir okkur áhorfendur sem höfum nú þegar séð jafnasta keppnistímabil í Formúlu 1 síðan 1983.

Brautin hentar helst loftaflslega skilvirkum bílum því hún býður upp á hraðar aflíðandi beygjur þar sem ökumenn munu helst reiða sig á vængpressu fremur en dekkjagrip. Ökumenn munu því reyna að fullkomna uppsetningu bíla sinna, sem kann hins vegar að reynast flókið verk fyrir óreynda.

Pirelli-dekkjaframleiðandinn býður, eins og venjulega, upp á tvær dekkjagerðir á Spáni. Það er hins vegar óvanalegt að bjóða upp á tvær gerðir sem eru ekki í næstu röð við hvort annað. Pirelli býður nefninlega upp á hörð og mjúk dekk en sleppa miðlungshörðu dekkjagerðinni. Það ætti að bjóða upp á fleiri möguleika fyrir liðin til að stilla upp keppnisáætlunum sínum.

Frægir sigrar og ósigrar

Brautin í Barcelona hefur oft boðið upp á óvænt úrslit og frækna sigra. Það var til dæmis árið 1996 þegar Michael Schumacher ók sitt fyrsta tímabil fyrir Ferrari að hann sigraði spænska kappaksturinn með gríðarlegum yfirburðum.

Ferrari-bíll þess árs var handónýtur og varla boðlegur Schumacher, þá tvöföldum heimsmeistara, og liðsfélaga hans Eddie Irvine. Spænski kappaksturinn fór fram í grenjandi rigningu en Schumacher lét það ekki á sig fá og slátraði keppinautum sínum. Eftir þennan frækna sigur hefur Schumacher verið talinn einn besti ökumaður í rigningu allra tíma.

Það fór ekki eins vel fyrir Mika Hakkinen á McLaren árið 2001. Mika hafði byggt upp gríðarlegt forskot á Schumacher í fyrsta sæti, eftir að hafa komist fram úr Þjóðverjanum á 43. hring.

Þegar aðeins einn hringur var eftir í mark bilaði kúplingin í McLaren-bílnum og Mika þurfti að leggja bílnum. Schumacher sveif fram úr og sigraði. Hann kom þó aftur hjá á sigurhring sínum og gaf Mika far heim að bílskúr.

DRS svæði: Á ráskaflanum öllum.

Dekkjagerðir í boði: Mjúk (option) og hörð (prime)

Efstu þrír árið 2011:

1. Sebastian Vettel - Red Bull

2. Lewis Hamilton - McLaren

3. Jenson Button - McLaren

Allt mótið er í beinni útsendingu á Stöð 2 Sport.

Föstudagur:

08:00 Æfing 1

12:00 Æfing 2

Laugardagur:

08:55 Æfing 3

11:50 Tímataka

Sunnudagur:

11:40 Spænski kappaksturinn

Staðan í titilbaráttunni eftir fjórar umferðir

Ökumenn

1. Sebastian Vettel - 53 stig

2. Lewis Hamilton - 49

3. Mark Webber - 48

4. Jenson Button - 43

5. Fernando Alonso - 43

6. Nico Rosberg - 35

7. Kimi Raikkönen - 34

8. Roman Grosjean - 23

9. Serio Pérez - 22

10. Paul di Resta - 15

Bílasmiðir

1. Red Bull - 101 stig

2. McLaren - 92

3. Lotus - 57

4. Ferrari - 45

5. Mercedes - 37