Rosberg fljótastur og Force India dregur sig í hlé

Nico Rosberg, á Mercedes-bíl, var fljótastur á seinni æfingu keppisliða fyrir Formúlu 1-kappaksturinn í Barein. Lewis Hamilton á McLaren-bíl var fljótastur á fyrri æfingunni.

Force India liðið tók ekki þátt í seinni æfingunni af hræðslu við óeirðirnar í landinu. Tekin var ákvörðun um að aka ekki eftir hádegi því það hefði þýtt að starfsmenn liðsins þyrftu að ferðast upp á hótel eftir myrkur. Allur undirbúningur, sem venjulega fer fram á föstudagskvöldum á mótstað, var framkvæmdur meðan á seinni æfingunni stóð.

Rosberg var nánast hálfri sekúntu fljótari en Mark Webber á Red Bull-bíl sem verður að teljast frábær árangur. Rosberg vann sinni fyrsta sigur í Formúlu 1 um síðustu helgi í Kína og ekur nú í Barein með sjálfstraustið í botni. Rosberg á met í Formúlu 1 sem hann setti í Barein árið 2006 þegar hann átti hraðasta mótshring í frumraun sinni í Formúlu 1.

Á eftir Webber, á seinni æfingunni, kom liðsfélagi hans Sebastian Vettel, þá Lewis Hamilton og Michael Schumacher var fimmti á Mercedes bíl sínum. Ferrari átti erfitt með að halda í við efstu menn og Fernando Alonso lauk deginum í áttunda sæti og liðsfélagi hans, Felipe Massa, í tólfta.

Fátt markverkt gerðist á fyrri æfingunni í morgun nema að liðin náðu að safna þeim gögnum og upplýsingum um ástand brautarinnar og bílanna sem þau þurftu án truflunar.