Svavar fékk 25 þúsund króna sekt

Svavar Vignisson, þjálfari kvennaliðs ÍBV, var í dag sektaður um 25 þúsund krónur fyrir ummæli sem hann lét falla í viðtölum við fjölmiðla eftir leik sinna manna gegn Gróttu í úrslitakeppni N1-deildar kvenna.

Svavar sakaði annan dómara leiksins um að hafa mætt til leiks angandi af áfengisfýlu. Eins og áður hefur verið fjallað um hefur viðkomandi dómari játað áfengisneyslu kvöldið áður og var Svavar því ekki sektaður fyrir þau orð.

Hins vegar lét hann síðar þau orð falla í viðtalinu að dómararnir báðir hafi dæmt eins og þeir væru blindfullir. Segir aganefnd HSÍ að þau ummæli séu óviðeigandi, sérstaklega í garð hins dómara leiksins.

Niðurstöðu aganefndarinnar má lesa í heild sinni hér fyrir neðan.

„Tekið var fyrir mál frá stjórn HSÍ sem bókað var inn hjá nefndinni á fundi sínum í gær. Aganefnd telur málið tækt til úrskurðar hjá nefndinni þar sem það fellur greinilega undir greinar 18 og 19 í „Reglugerð HSÍ um agamál". Greinargerð hefur borist frá ÍBV um málið. Um er að ræða ummæli sem Svavar Vignisson starfsmaður M.fl.kv. hjá ÍBV hafði, eftir að leik Gróttu og ÍBV lauk, hjá RÚV, sport.is og visi.is þann 14. þessa mánaðar. Þegar hefur komið fram við afgreiðslu dómaranefndar HSÍ á málinu að annar dómari leiksins hafði neytt áfengis fram til kl. 24 kvöldið fyrir leik en að dómarans sögn ekki eftir það. Þrátt fyrir það telur Svavar sig hafa fundið áfengislykt af öðrum dómara leiksins áður en leikur hófst og drögum við það ekki í efa þó nokkurt hafi verið liðið frá því hann neytti áfengis. Það verður að teljast mjög ámælisvert af dómara í svo mikilvægum leik, sem leikur í úrslitakeppni er, að neyta áfengis kvöldið fyrir leik. Það er í raun vanvirðing við íþróttina, félögins sem eru að leika sem og meðdómara sinn.

Aganefnd telur sig því ekki getað beitt neinum viðurlögum við þeim orðum Svavars að annar dómari leiksins hafi mætt til leiks „angandi af áfengisfýlu". Þó að vissulega skaði þessi ummæli íþróttina er það í raun sá sem kemur til leiks í óásættanlegu ástandi sem skaðar íþróttina en ekki sá sem segir frá.

Önnur ummæli Svavars eru hins vegar ámælisverð. Það eru:"Enda dæmdi hann eins og hann væri fullur" og „..og svo dæma þeir báðir eins og þeir séu blindfullir". Ljóst er að þessi lýsingarorð koma í kjölfar þess að hann segir frá áfengislykt af öðrum dómaranum og verða því að skoðast í því samhengi. Alvarlegast er að með þessum orðum er hann að ýja að því að dómarar hafi verið undir áhrifum áfengis en hann dró þó í land með það síðar. Jafnfram blandar hann þarna inn í meðdómara þess sem ásakaður var en honum hefur á engan hátt verið brigslað um áfengisneyslu og er þessi orð því mjög svo óviðeigandi sérstaklega gagnvart honum.

Niðurstaða aganefndar er að Svavar Vignisson starfsmaður M.fl.kv hjá ÍBV er úrskurðaður í sekt að upphæð kr. 25.000."