Umfjöllun og viðtöl: Akureyri - FH 25-28 | FH í úrslitin

FH fær tækifæri til að verja Íslandsmeistaratitil sinn í handbolta eftir að hafa rutt Akureyringum úr vegi í undanúrslitarimmu liðanna í úrslitakeppni N1-deildar karla. FH vann fjórða leik liðanna í kvöld og þar með rimmuna, 3-1.

FH-ingar voru skrefi framar nánast allan leikinn en Akureyringar voru þó aldrei langt undan. Munurinn í hálfleik var tvö mörk, 14-12.

Liði Akureyrar dugði ekkert annað en sigur í þessum leik og gaf Sveinbjörn Pétursson, markvörður liðsins, tóninn þegar hann varði víti Hjalta Þór Pálmasonar í upphafi leiksins. Í upphafi var jafnræði með liðunum og þau skiptust á að leiða með einu marki.

Það var svo á 19. mínútu sem það lifnaði heldur betur yfir leiknum. Akureyringar misstu tvo leikmenn af velli með stuttu millibili og FH-ingar gengu á lagið og náðu mest fimm marka forustu. Undir lok hálfleiksins svöruðu Akureyringar aftur fyrir sig og náðu að minnka forskotið niður í tvö mörk, 12-14.

Nokkuð illa gekk hjá leikmönnum beggja liða að koma boltanum í netið í upphafi síðari hálfleiks. Markverðir beggja liða vörðu vel ásamt því að sóknarleikur liðanna gekk ekki að óskum. FH-ingum tókst þó að halda Akureyringum 2-3 mörkum frá sér þangað til um tíu mínútur voru eftir en þá náðu Akureyringar að minnka muninn í eitt mark. Nær komust Akureyringar þó ekki og á endanum landaði FH verðskulduðum þriggja marka sigri.

Ólafur: óþarfi að gefa HK auka frí

„Það er algjör óþarfi að gefa HK lengra frí til að jafna sig þannig að við lögðum upp með það að klára þetta í kvöld. Það var frábært að það hafðist," sagði Ólafur sem var markaæhstur leikmanna FH ásamt Ragnari Jóhannssyni.

„Annars var hrikalega lítill munur á liðunum í kvöld. Við náðum smá forskoti en þeir náðu svo að minnka muninn í eitt mark. Eftir það var leikurinn í járnum en við græddum á því að eiga óþreytta menn á bekknum fyrir lokasprettinn. Ég fékk hvíld í síðasta leik þannig að ég var fullur af orku í dag og ætlaði mér að klára þetta í þessum leik."

Kristján: Ekki gaman nema að þetta sé erfitt

„Við vorum með aðeins meiri breidd og náðum að rúlla á fleiri leikmönnum. 6-0 vörnin okkar var mjög sterk og þeir áttu í erfiðleikum með hana. Raggi átti frábæran leik og Óli kom mjög sterkur inn í seinni hálfleikinn. Aðrir leikmenn líka að gera góða hluti," sagði Kristján.

„Við héldum þeim niðri í hraðaupphlaupum þangað til að þeir fóru að taka áhættu og keyra á okkur. Með því náðu þeir að komast aftur inn í leikinn en við héldum okkar línu, fórum ekki á taugum og náðum að koma þessu í hús."

„Þetta er 17. leikurinn sem við spilum gegn Akureyri núna á tveimur árum í opinberum leikum á vegum HSÍ - vídeófundirnir voru orðnir ansi þreyttir. Það er gott að fá aðeins að hvíla okkur fyrir átökin á móti HK sem sýndi virkilega mikinn styrkleika á móti Haukum. Það verður erfitt en annars væri ekkert gaman að þessu."

Atli: Við hefðum viljað fara lengra

„Þetta féll svolítið með þeim í dag og vorum við frekar óheppnir," sagði Atli Hilmarsson, sem stýrði Akureyri í síðasta sinn í kvöld.

„Það verður ekkert tekið af FH-ingum - þeir spiluðu vel. Þegar við lentum tveimur mörkum undir í fyrri hálfleik misstum við dampinn. Það var ætlunin að jafna leikinn strax í upphafi seinni hálfleiks en við fórum svolítið illa að ráði okkar."

„Við hefðum þurft að ná að jafna leikinn en komumst aldrei nær en einu marki. FH-ingarnir spiluðu bara vel og eru verðugir sigurvegarar þessa einvígis."

„Við vorum búnir að hafa mikið fyrir því að komast í þessa úrslitakeppni og lentum í miklum hremmingum á leiðinni. Mér fannst samt mjög flott að ná þriðja sætinu í deildinni og við hefðum viljað fara lengra í úrslitakeppninni. Ég vil meina að við séum með lið til þess en heimaleikjarétturinn reyndist ef til vill dýrmætur fyrir FH-inga þegar uppi var staðið."