Nigella Lawson grennist meðan að bankareikningur hennar fitnar

Nigella Lawson, eldhúsgyðjan með mjúku línurnar, hefur grennst svo mikið að kjólar hennar hafa farið úr stærð 18 og niður í þrýstna 12. Aftur á móti hefur bankareikningur hennar fitnað verulega.

Nigella Lawson er ekki síður þekkt fyrir þrýstinn líkamsvöxt en matseld í þáttum sínum á BBC. Kílóin hafa hinsvegar hrunið af henni undanfarnar vikur mörgum aðdáendum til nokkurrar hrellingar.

Hún viðurkennir fúslega að vera í megrunarkúr og segir að sú kona sem ekki viðurkenni að hafa reynt slíkt a.m.k. einu sinni á ævinni sé lygari.

Aftur á móti hefur bankareikningur Lawson fitnað í takt við megrunina. Hagnaður rekstrarfélags Lawson á síðasta ári jókst um 25% og nam 1,4 milljónum punda eða um 280 milljónum króna. Fyrir utan þættina á BBC hefur Lawson tekjur af bókasölu og eldhúsáhöldum sem seld eru undir hennar merki.

Lawson hefur því vel efni á að grennast. Og þótt hún hætti að elda er Lawson ekki á flæðiskeri stödd. Auður hennar og eiginmannsins, fyrrum auglýsingajöfursins Charles Saatchi, er metinn á um 22 milljarða króna.