Símarnir voru opinberaðir á tækniráðstefnu í Barcelona og stigu stjórnendur fyrirtækjanna þar á stokk og ræddu um tækninýjungar og framfarir í snjallsímatækni.
Framleiðendur einblína greinilega á vinnsluhraða því snjallsímarnir eru flestir knúnir af fjórföldum örgjörvum - Sony heldur sig þó við tvöfalda örgjörva.
Nýjasti snjallsími LG er kallaður Optimus 4X HD. Hann hefur háskerpu skjá og styður 4G. Síminn er sérhannaður fyrir leikjaspilun.
Kínverska tæknifyrirtækið Huawei kynnti síðan Ascend D Quad og segja stjórnendur fyrirtækisins að snjallsíminn sé sá hraðasti sem nokkurn tíma hefur komið á markað.
Sony mun halda áfram að þróa Xperia snjallsímana og verða nýju símarnir töluvert ódýrari en fyrri símar í línunni.
HTC einblínir á hugbúnaðarþróun. Þá verða eldri týpur endurhannaðar og lækkaðar í verði. Að auki fá myndavélar símanna uppfærslu.
