Petrov ekur fyrir Caterham í stað Trulli

Rússneski ökuþórinn Vitaly Petrov sem var á mála hjá Lotus liðinu á síðasta tímabili hefur nú gengið til liðs við Caterham og mun aka þar í ár í stað Jarno Trulli sem ekið hefur fyrir liðið frá því það kom fyrst til sögunnar árið 2010.

Petrov hefur verið orðaður við Caterham undanfarnar vikur þó bæði keppnissæti liðsins hafi verið skipuð. Það hefur jafnframt legið í loftinu að Jarno Trulli væri á útleið úr Formúlu 1 eftir að hafa ekið í mótaröðinni síðan 1997. Í ár verður því enginn ítalskur ökuþór á ráslínunni í fyrsta sinn síðan 1970.

Petrov missti sæti sitt hjá Renault liðinu - sem nú er Lotus - eftir að Kimi Raikkönen og Roman Grosjean voru ráðnir þar inn. Petrov mun nú aka við hlið Heikki Kovalainen hjá Caterham. Í viðtali við Autosport sagðist Petrov vera ánægður með að fá tækifæri hjá liði sem hefði jafn mikinn eldmóð og Caterham.

Caterham liðið er í eigu malasíska auðjöfursins Tony Fernandes sem einnig á knattspyrnuliðið Queens Park Rangers sem leikur í ensku úrvalsdeildinni.