Barrichello íhugar tilboð frá Indy kappakstursliði

Rubens Barrichello hefur á undanförnum dögum tekið þátt í æfingaakstri hjá KV Racing Technology sem staðsett er í Bandaríkjunum. Svo gæti farið að hinn 39 ára gamli Brasilíumaður keppi í Indy kappakstrinum en Barrichello hefur keppt í 19 ár sem Formúlu 1 ökumaður.

Í viðtali við CNN sagði Barrichello að hann væri ekki viss hvað framtíðin bæri í skauti sér. „Ég kann vel við mig hérna, bíllinn frábær, og liðið líka. Ég mun fara með fjölskylduna til Brasilíu og þar mun ég taka ákvörðun um framhaldið," sagði Barrichello sem missti starf sitt hjá Williams-liðinu sem fékk landa hans Bruno Senna í staðinn.

Barrichello keppti fyrst í F1 árið 1993 hjá Jordan-liðinu og hefur hann tvívegsi endað í öðru sæti í keppni ökumanna, 2002 og 2004, á eftir Michael Schumacher sem þá ók fyrir Ferrari-liðið.