Paul di Resta: Furðulegu bílarnir betri í ár

Skoski ökuþórinn Paul di Resta hjá Force India liðinu sagði í viðtali á Spáni í dag að nýju bílarnir væru betri en þeir í fyrra þrátt fyrir strangari reglur. Æfingatímabil F1 liða stendur nú yfir. Vænta má betri hringtíma í mótum ársins að mati di Resta.

"Ég held að bílarnir séu fljótari. Formúla 1 er í stöðugri þróun og ég geri ráð fyrir að allir séu að reyna við takmörkin," sagði hann í fyrirspunatíma á Autosport.com í dag. "Það eru merki um að þeir séu enn hraðskreðari en bílarnir í fyrra."

"Dekkin eru sömuleiðis betri í ár. Þau eru auðvitað aðeins öðruvísi en það er erfitt að henda reiður á eiginleika dekkjanna í nýjum bíl, með öðruvísi fjöðrun. En til þess erum við að æfa: Til að sækja gögn og upplýsingar."

Mikið hefur verið rætt um nýstárlegt útlit F1 bíla ársins 2012. Nánast öll liðin sína hafa sett nokkuð bratta "hillu" á framhluta bílsins til að mæta reglubreytingum ársins. McLaren liðið er eina liðið sem þegar hefur frumsýnt bíl sinn sem notast ekki við þessa útfærslu. Kemur það meðal annars til vegna þess hve lágur MP4-27 bíll er. Di Resta segist ekki hafa miklar áhyggjur af furðulegu útliti bílanna.

"Ég er að venjast þeim. Þeir líta ekkert svo illa út. Þetta er svipað og þegar þeir hækkuðu afturvænginn og settu stóra framvængi, það varð mjög fljótt venjulegt. En þetta snýst ekki um hversu flott það er heldur hversu gott."