Auðugur Rússi er leynilegur eigandi Saab

Þegar sænski bílaframleiðandinn Saab var seldur í fyrra gerði seljandinn, General Motors (GM), það að skilyrði að rússneski auðmaðurinn Vladimir Antonov yrði ekki í eigendahópnum. Svo virðist sem ekki hafi verið farið að óskum GM.

Það var bílaframleiðandinn Spyker sem keypti Saab af GM en Antonov átti þá 30% hlut í Spyker. GM krafðist þess að Antonov losaði sig við hlut sinn áður en kaupin á Saab voru samþykkt. Ástæðan fyrir kröfu GM var þrálátur orðrómur í kringum Antonov um að hann væri viðriðinn ólögleg viðskipti og svarta peninga.

Samkvæmt frétt í blaðinu Svenske Dagbladet í dag er auðvelt að sýna fram á að Antonov á enn a.m.k. tæplega 12% hlut í Saab. Blaðið hefur rannsakað málið og segir að Antonov eigi þennan hlut í gegnum fjárfestingarsjóðinn Gemini Investment Fund.

Gemini er skráð á Bahamaeyjum og er stjórnað af Stanislav Kovtun sem aftur er fyrrum forstjóri Convers Group sem er móðurfélag Antonov. Þar að auki er heimasíða Gemini skráð hjá Convers Group og keyrir á netþjóni félagsins. Þá fara öll viðskipti með hluti í Gemini í gegnum bankann Krajbanka sem er að hluta í eigu Antonov.

Sjálfur segir Vladimir Antonov í svari við fyrirspurn blaðsins að þetta sé ekki rétt og að hann hafi ekkert með Gemini sjóðinn að gera. Hinsvegar viti hann hverjir séu fjárfestar í Gemini en vill ekki upplýsa það.