Streep á forsíðu Vogue í fyrsta sinn

Leikkonan Meryl Streep prýðir forsíðu janúarheftis tímaritsins Vogue en þetta er í fyrsta sinn sem hún fær að vera á forsíðu tískublaðsins.

Streep er með tvenn Óskarsverðlaun, 16 Óskarstilnefningar, sjö Golden Globe-verðlaun og tvenn Emmy verðlaun á ferilskránni og því í raun furðulegt að hún hafi ekki verið kölluð til fyrr.

„Ég hef verið að grínast með það að ég er trúlega elsta manneskjan sem hefur verið á forsíðu Vogue,“ segir Streep í viðtali við US Magazine en hún er 62 ára gömul.

Í viðtali við Vogue viðurkennir Streep að hún hafi haldið að ferillinn væri á enda þegar hún varð fertug. Leikkonan hefur hins vegar aldrei verið vinsælli, enda valin á forsíðu helstu tískubiblíu heims.