Radcliffe er sóði

Kærasta Daniels Radcliffe, Rosie Coker, hefur gefið Harry Potter-leikaranum tvö ár til að bæta umgengni sína. Hann sé nefnilega ótrúlegur sóði heima fyrir. Radcliffe viðurkennir þennan ókost sinn í viðtali nýlega. „Ég held að þetta þýði að ég verði að geta eldað sjálfur og að ég geti ekki leyft mér að skilja við húsið okkar eins og ég geri þessa dagana. Hún hefur gefið mér þennan frest þannig að ég geti fúnkerað heima fyrir,“ bætir Radcliffe við.

Leikarinn býr um þessar mundir í New York og þegar kærastan kom í heimsókn fékk Radcliffe aðstoð hjá móður sinni við að taka til. „Mamma mín er hérna með ryksuguna á fullu,“ hefur breska blaðið Daily Mail eftir honum.