Kría færir út kvíarnar

Hönnun Jóhönnu Metúsalemsdóttur, sem hannar undir nafninu Kría, hefur verið tekin til sölu í versluninni Project No8 sem staðsett er í Ace-hótelinu á Manhattan. Project No8 er hönnunarverslun sem selur hönnun hvaðanæva að, en á hótelinu er einnig verslun sem rekin er í samstarfi við tískuhúsið Opening Ceremony.

Jóhanna segir ánægjulegt að Kríuskartið skuli vera fáanlegt á Ace-hótelinu enda sé það flott hótel sem leggi mikið upp úr hönnun. „Ég var að selja Kríu í verslun Project No8 á Division Street en þau ákváðu að færa það yfir í Ace-hótelið því þeim fannst það passa vel þar inn, sem gladdi mig mikið enda er þetta ótrúlega flott búð.“

Vinsældir skartsins hafa farið vaxandi í New York og rekst Jóhanna í auknum mæli á fólk á götum úti sem skreytt er með hönnun hennar. „Það er líka mikið spurt um skartið fyrir hinar ýmsu myndatökur og það er alltaf mjög jákvætt enda vekur það athygli á merkinu.“

Jóhanna hyggst færa út kvíarnar á næstunni og ætlar þá bæði til Skandinavíu og Parísar. „Það er allt í vinnslu eins og er. Núna er ég í miðjum klíðum við að hanna nýtt skart sem verður tilbúið í þessum mánuði. Ég er með sýnishorn af því í Bellevue Mall í Seattle í tengslum við Fashion Week sem er á vegum Vogue USA og mun einnig taka þátt í Nordic Fashion Biennale sem er í Seattle í lok september,“ segir Jóhanna að lokum.- sm