Jarðfræðingurinn Margrét Theodóra Jónsdóttir hefur haft áhuga á kökugerð frá unga aldri og sinnir áhugamálinu í hjáverkum. Hún sérhæfir sig í kökum með smjörkremi og getur gert alls kyns kúnstir. Hún féllst á að hanna og gera tveggja hæða fermingarköku fyrir Fréttablaðið sem gefur góða mynd af þeim möguleikum sem eru fyrir hendi.
„Mér finnst skemmtilegast að hanna kökurnar og er því lítið í fjöldaframleiðslu."
En hvenær vaknaði áhuginn?
„Mamma keypti Wilton-kökuskreytingarbók þegar ég var yngri og ég og litli bróðir minn gátum legið yfir henni tímunum saman. Þegar ég fór með manninum mínum til náms í Ameríku ákvað ég svo að nota tækifærið og fara á kökuskreytingarnámskeið hjá Wilton.
Ég lauk við Wilton Method Basics þar sem ég lærði grunnatriðin í kökugerð og kökuskreytingum eins og hvernig maður bakar og undirbýr fallega köku, hversu þykkt smjörkremið á að vera fyrir hvert einstaka atriði, stöðu sprautupoka og fleira. Síðan fór ég á Wilton MethodFlowers and Cake Design námskeið þar sem aðaláherslan var lögð á sykurblómagerð. Þar að auki lauk ég við sérstakt brúðartertunámskeið hjá Cake Art."
Margrét býr yfirleitt til möndlubotna með hindberjamús og vanillusmjörkremi en gerir líka súkkulaðikökur með ýmis konar fyllingum. „Allt hráefnið sem ég vinn með er ætilegt og sömuleiðis allar skreytingar."
En getur þú hugsað þér að leggja þetta fyrir þig?
„Ég veit það nú ekki en ef jarðfræðin klikkar er gott að hafa þetta í bakhöndinni og svo er gaman að geta gripið í þetta af og til."
Áhugasamir geta einnig kíkt á Facebook-síðu Margrétar, sem hún kallar Kakan mín. -ve
