Methagnaður hjá stærstu verslun Norðurlanda

Sænska verslunin Gekås skilaði methagnaði á síðasta ári. Nam hagnaðurinn 3,8 milljörðum sænskra kr. eða um 66 milljörðum kr. Veltan nam 25,7 milljörðum sænskra kr. á árinu.

Verslunin, sem er staðsett við bæinn Ullared, er sú stærsta á Norðurlöndunum. Gekås stærir sig af því að hafa allt til staðar í versluninni á lágu verði. Verslunarplássið er á við fimm fótboltavelli í fullri stærð og hvergi er að finna fleiri bílastæði fyrir utan einn stað í Svíþjóð ef Arlanda flugvöllurinn er undanskilinn.

Alls komu 4,5 milljónir viðskiptavina í verslunin á síðasta ári. Könnun leiddi í ljós að hver viðskiptavinur ferðast að meðaltali 245 km bara til að versla í Gekås. Það eru ekki bara Svíar sem versla í Gekås, þangað eru skipulagðar rútuferðir frá Noregi, Danmörku, Þýskalandi og Hollandi.

Biðraðarmet var sett hjá Gekås 30. október í fyrra. Þá komu 81 rúta að versluninni á sama tíma. Vegna reglna um brunavarnir má bara viss fjöldi vera inni í versluninni á hverjum tíma svo að biðröð myndaðist. Mældist hún 1,4 km að lengd þegar mest var.

Það athyligsverða við Gekås er að verslunin eyðir nær engu í að auglýsa sig. Ein auglýsingin, sem birtist á hverju ári, er tvídálka jólakveðja í staðarblaðinu Hallands Nyheter.