Magma tapaði milljarði á öðrum ársfjórðungi

Magma Energy skilaði tapi upp á 9,1 milljón dollara eða ríflega milljarði kr. eftir skatta og afskriftir á öðrum ársfjórðungi yfirstandandi reikningsárs félagsins en fjórðungnum lauk um áramótin. Þetta er töluvert verri niðurstaða en á sama tímabili árið áður þegar tapið nam 5,2 milljónum dollara.

Í tilkynningu um uppgjörið segir að megnið af þessu tapi, eða 6,9 milljónir dollara er vegna endurmats á skuldum félagsins og tap á afleiðusamningum.

Fram kemur að tekjur af orkusölu á fjórðungnum námu 18,8 milljónum dollara. Á móti var framleiðslukostnaðurinn 13,3 milljónir dollara þannig að brúttóhagnaður, það er hagnaður fyrir skatta, afskriftir og fjármagnsliði, félagsins nam 5,5 milljónum dollara.

Fjallað er um HS Orku í uppgjörinu og þar segir að framleiðslan þar hafi verið í takt við væntingar.

Ross Beaty forstjóri Magma segir í uppgjörinu að félagið muni áfram einbeita sér að stækka orkuver þess á Reykjanesi.

Þá kemur fram í máli forstjórans að viðræður við lífeyrissjóði á Íslandi um kaup þeirra á hlut í HS Orku séu vel á veg komnar.