Þyrst olíumiðlun á bakvið verðhækkanir á olíu

Kaup bandarískrar olíumiðlunar á miklu magni af hráolíu úr Norðursjó gæti ýtt heimsmarkaðsverðinu á olíu yfir 100 dollara á tunnuna.

Daily Telegraph fjallar um málið en í frétt blaðsins kemur fram að olíuviðskiptafélagið Hecto hafi byggt upp gríðalega stöðu í breska hlutanum af olíuvinnslunni í Norðursjó. Hefur Hecto keypt 30% af framleiðslunni á Forties svæðinu, sem er það stærsta í Norðursjó og 25% af framleiðslunni frá Brent svæðinu. Olíuna á að afhenda í febrúar.

Þessi kaup eru það umfangsmikil að þau hafa haft veruleg áhrif á verðþróun olíu að undanförnu. Þannig hefur svokölluð Brent olía frá Norðursjó hækkað upp í 98 dollara á tunnuna að undanförnu en verðið á Brent olíunni er notað til viðmiðunar í um þriðjungi af öllum olíuviðskiptum í heiminum. Á meðan hefur bandaríska léttolían, WTI, „aðeins" hækkað í 92 dollara.

Telegraph segir að þessi munur á Brent og WTI, sex dollarar, sé í sögulegu hámarki. Þá kemur fram að Hecto hafi jafnvel í hyggju að kaup enn meira magn af hráolíu úr Norðursjó.

Hinsvegar gengur nú orðrómur um í olíuviðskiptaheiminum að Hecto hafi síðustu þrjá daga reynt að finna kaupenda að olíunni í febrúar en án árangurs.