Willum: Hef ekki haft tíma til að fara með gleraugun í viðgerð

Gleraugun hans Willums Þór Þórssonar, nýráðins þjálfara Leiknis, hafa vakið talsverða athygli síðustu vikur enda eru þau löskuð og fest saman með teipi. Vísir spurði Willum að því hvað hefði komið fyrir gleraugun.

"Þegar ég var með Keflavík unnum við góðan sigur á Val. Þeim sigri var fagnað ógurlega. Í þeim fagnaðarlátum fór ein "háfimman" aðeins fram hjá hendinni minni og lenti í gleraugunum með þeim afleiðingum að þau brotnuðu. Ég hélt samt áfram að fagna en sá lítið," sagði Willum.

"Það er búið að vera svo mikið að gera hjá mér að ég hef ekki enn haft tíma til þess að fara með þau í viðgerð. Það hlýtur að koma að því."