Oddur: Kvörtum ekki þó menn séu meiddir

Oddur Gretarsson átti mjög fínan leik í vængbrotnu liði Akureyrar sem tapaði gegn Fram í kvöld. Hornamaðurinn Oddur lék á miðjunni og leysti það hlutverk vel af hendi.

"Við erum þunnskipaðir en við sýndum í dag að við erum með fínan hóp. Það eru mikil meiðsli en við kvörtum ekki yfir því," sagði Oddur en Akureyrarliðið stóð vel í Frömurum sem kom mörgum á óvart.

"Þegar við erum með alla heila erum við með 2-3 leikmenn í sumum stöðum. Það vantaði herslumuninn hjá okkur í dag.

"Fram er með mjög sterkt lið og fínan heimavöll. Þeir virka góðir en það eru fleiri góð lið í deildinni. Við ætlum ekki að gefa eftir þó svo við missum nokkra menn."