Maldonado og Hamilton búnir að sættast eftir samstuðið á Spa

Pastor Maldonado hjá Williams Formúlu 1 liðinu náði í sín fyrstu stig í Formúlu 1 á sunnudaginn, en hann varð heimsmeistari í GP2 mótaröðinni í fyrra. Hann hefur tvívegis lent í samstuði við Lewis Hamilton hjá McLaren á þessu ári, í seinna skiptið í tímatökum á Spa brautinni á laugardaginn og dómarar refsuðu honum vegna atviksins. En hann er ánægður með fyrstu stigin.



„Ég mun ekki slaka á, ég er baráttuhundur. Ég hef barist allt tímabilið og pressað á liðið að bæta bílinn til að bæta árangurinn", sagði Maldonado í frétt á autosport.com



Williams liðinu hefur ekki gengið vel, en þetta fornfræga lið hefur unnið marga meistaratitla gegnum tíðina. Maldonado segir bíl Williams ekki hafa verið góðan í upphafi tímabilsins, en liðið hefur samið við Renault um vélar á næsta ári í stað Cosworth. Renault vél er í bílum Red Bull meistaraliðsins, sem hefur haft nokkra yfirburði á þessu keppnistímabili.



„Ég er nokkuð ánægður því liðsandinn er nokkuð jákvæður, jafnvel þó ekki hafi gengið vel. Það getur allt gerst og vonandi getum við bætt okkur á tímabilinu og unnið af kappi fyrir næsta ár.

Maldonado er sagður hafa komið með á annan tug miljóna dala í auglýsingafé fyrir tímabilið og þess vegna fengið ökumannssætið hjá Williams, en Nico Hülkenberg missti sæti sitt til has fyrir keppnistímabilið.



„Mér er sama hvað fólk segir. Liðið veit hver ég er og aðrir í Formúlu 1. Ég vann GP2 í fyrra og hafði yfirburði. Ég hef haft öflugan liðsfélaga sem hjálpar mér og ég er að bæta mig hratt. Ég þarf að vinna mína vinnu og það er það sem ég er að gera."



Maldonado hefur tvisvar lenti í árekstri við Hamilton. Fyrst keyrði Hamilton á Maldonado í Mónakó á harkalegan hátt. Síðan lentu þeir í samstuði í tímatökunni á Spa brautinni á laugardaginn og Maldonado fékk fimm sæta refsingu á ráslínu vegna þess atviks og Hamilton áminningu. Eftir keppnina sagði Hamilton að sökin hefði verið sín, eftir að hafa skoðað myndband af atvikunu.



„Við ræddum það sem gerðist og það er búið að hreinsa andrúmsloftið og ég lít fram veginn. Hann er hæfileikaríkur ökumaður og góður vinur minn. Við þurfum að virða hvorn annan og horfa til framtíðar", sagði Maldonado.