Vettel: Spa draumabraut ökumanna

Heimsmeistarinn í Formúlu 1,  Sebastian Vettel hjá Red Bull telur að Spa brautin í Belgíu sem verður notuð um næstu helgi sé draumur fyrir ökumenn. Vettel hefur gott forskot í stigamóti ökumanna fyrir tólfta mót ársins um næstu helgi, en Mark Webber hjá Red Bull er í öðru sæti og Lewis Hamilton hjá McLaren í því þriðja.

Mótið á Spa brautinni er það tólfta af nítjan á þessu keppnistímabili.

„Spa brautin hefur allt upp á bjóða sem ökumenn dreymir um. Ótrúlega hraðar beygjur og hæga kafla. Vegna veðursins geta verið óvæntar uppákomur.  Það getur verið rigning eina mínútuna og sólskin þá næstu. Brautin er ein af þeim sem er í uppáhaldi hjá mér", sagði Vettel í fréttatilkynningu frá Red Bull.

„Eau Rogue og Blanchimont beygjurnar eru hápunktar. Í þurru er hægt að keyra þær án vandamála, en í bleytu er þetta önnur saga og það þarf kjark til að aka þær á fullri gjöf. Uppáhaldshluti minn er tvöfalda vinstri beygjan Pouhon. Maður er í sjötta gír, slær af í augnablik og er svo í 280 i beygjunni. Síðasti hlutinn er vandasamur, þar sem bíllinn togast í allar áttir og það þarf fullkomna einbeitingu til að halda honum á brautinni."

Vettel mætir eins og aðrir ökumenn endurnærður til leiks á Spa brautina eftir 3 vikna sumarfrí keppnisliða í ágúst.

„Það hefur verið frábært að fá frí í sólinni og að geta slakað á við iðkunn vatnaíþrótta, en ég get ekki beðið eftir að komast aftur um borð í bílinn" sagði Vettel.